ಆಟಿ ಬನ್ನಗ ಅಟ್ಟದ ಕಾಲಿಗೆ, ಸೋನ ಬನ್ನಗ ಪೆಲತರಿ ಚೋಲಿಗೆ

ಸುತ್ತಿಗೆದಾತ್ ಮಲ್ಲೆ, ಹರಿವಾಣದಾತ್ ಉರುಟು, ಪಣವುದಾತ್ ಪೊರ್ಲು ಇಪ್ಪುನ ನಾಗನ ನಡೆ, ಪಂಚ ವರ್ಣದ ಪುಂಚದ ಮಣ್ಣ್, ನಮ್ಮ ತುಳುನಾಡ ಮಣ್ಣ್. ಜೀವದಾಂತಿನ ಕಲ್ಲ್‌ಗ್ ಜುವ ಕೊರಿನ ಮಣ್ಣ್. ‘ವಿಜ್ಞಾನ ತೂವಂದಿನ ಬೊಲ್ಪುನು ಜೀಟಿಗೆದ ಬೊಲ್ಪು ತೋಜಾಂಡ್’ ಇಂಚಿತ್ತಿನ ತುಳುನಾಡ್‌ದ ಪವಿತ್ರನಾಡ್‌ಡ್ ನಂಬಿಕೆನೇ ಮಾಮಲ್ಲ ತುಳುವೆರೆನ ಆಸ್ತಿ.
ಪಗ್ಗುದ್ದ್ ಪತ್ತಿನ ಸುಗ್ಗಿ ಮುಟ್ಟ ಪನ್ಪಿನ ಪದ್‌ರಾಡ್ ತಿಂಗೊಳು. ಪ್ರತಿ ತಿಂಗೊಳುಲ ಬಾರಿ ವಿಸೇಸವಾಯಿನ ತಿಂಗೊಳುಲು. ಆಂಡ ನೆಟ್ಟ್, ಆಟಿ ಪನ್ಪಿನವು ಬಾರಿ ಎಚ್ಚರಿಕೆ ಕೊರ್‍ಪಿನ ತಿಂಗೊಳು. ದಾಯೆ ಪಂಡ ಬೇಸ ಪತ್ತನಾಜೆಗ್ ಆರಾಧನೆ ವಿಚಾರಗ್ ವರ್ಸದ ಅಂತ್ಯ ಬುಕ್ಕ ಬೆನ್ನಿದ ಕಾರ್ಯಗ್ ಅನುವ್ ಆಪುನ. ಪನ್ಪಿನ ವಿಚಾರಲ ಅಂದ್. ಬುಕ್ಕ ಬರ್‍ಪಿಮ ತಿಂಗೊಳು ಕಾರ್ತೆಲ್ ತಿಂಗೊಳ್. ದೆನ್ ಕರ್ತೆಲ್ ಪಂದ್‌ಲಾ ಪನ್ಪೆರ್. ಈ ತಿಂಗೊಳು ಜಿಡಿಜಿಡಿ ಬರ್ಸೊ, ಇಂಚಿತ್ತಿನ ಬರ್ಸೊಡ್ ಸಾಗುವಳಿದ ಕಾರ್ಯ ಕಜ್ಜ ಮಾಲ್ಪೆರ್. ಕಾರ್ತೆಲ್ ಮುಗಿಯರ ದುಂಬು, ಬಿತ್ತ್‌ದ್ ಪುಣಿಕಟ್ಟದ್ ಮಾಂತಕಾರ್ಯನ್ ನಮ್ಮ ಹಿರಿಯರ್ ಮುಗಿತೊಂದ್ ಇತ್ತೆರ್, ಬುಕ್ಕ ಬರ್ಪಿನ ತಿಂಗೊಳೇ ಆಟಿ.
ಬಾರಿ ಕಷ್ಟದ ತಿಂಗೊಳು. ಒಂಜಿ ಪಾತೆರನೇ ಉಂಡು “ಆಟಿ ಬನ್ನಗ ಅಟ್ಟದ ಕಾಲಿಗೆ, ಸೋನ ಬನ್ನಗ ಪೆಲತರಿ ಚೋಲಿಗೆ” ಈ ಪಾತೆರದ ಲೆಕೊನೆ, ಹಿರಿಯರೆನ ಬದ್‌ಕ್‌ಲಾ ಇತ್ತಂಡ್. ಸುಗ್ಗಿದ ಬುಲೆನ್ ನಂಬುದ್ ಬೇಸಾಯ ಮಾಲ್ಪೆತೆರ್. ತಿನಿಯರಲ ಅವ್ವೆ ಅರಿ. ಸಂಬಳಗ್ ಅವೇ ಅರಿ. ಇಂಚಿತ್ತಿನ ಸಮಯಡ್ ಏತ್ ಇತ್ತಿನಾಯನ ಅಟ್ಟಲಾ ಖಾಲಿ ಆಪುನ ಸಮಯ ಪನ್ಪೆತೆರ್. ಪಾಪಾದ ಒಕ್ಕಲ್‌ದಾಯನ ಪರಿಸ್ಥಿತಿ ಪಂಡ್‌ದ್ ಮುಗಿಯಂದ್. ಉಳ್ಳಾಯನ ಇಲ್ಲ್‌ನ್ ನಂಬುದು, ಪೂಲು, ಬಚ್ಚಿರೆಗ್ ಬೋಡಾತ್ ಉಳ್ಳಯನ ಇಲ್ಲ್‌ದ ಜಾಲ್ ಆಡಿಪುನ ಸಮಯ ಅವು.
ಅಂಚನೇ ಪ್ರಕೃತಿಲಾ ಒಂಜಿ ರೀತಿದ ಗೊಬ್ಬು ಗೊಬ್ಬೊಂದ್ ಇತ್ತ್ಂಡ್! ಅರೆಗಳಿಗೆ ಸುಡುಪುನ ದೊಂಬು, ಅರೆಗಳಿಗೆ ಜಡಿಗುಡ್ಡ ಬರ್ಸ. ಈ ಪೊರ್ತುಡ್ “ಆನೆದ ಬೆರಿ ಪುಡಾವುಗೆ, ಪುಚ್ಚೆ ಬೆರಲುಗೆ” ಪನ್ಪಿನ ಪಾತೆರ ಉಂಡು. ಇಂಚಿತ್ತಿನ ಸಮಯಡ್ ಹವಾಮಾನದ ವೈಪರಿತ್ಯ ಇತ್ತಿನೆರ್‍ದಾವರ ಸೀಕ್ ಬರ್‍ಪಿನ ಜೋರು. ಐಕ್ ಬೋಡಾದ್ ಆಟಿದ ತಿಂಗೊಳು ಅನೇಕ ಪುಲಮರ್ದ್ ಬಂಜಿಗ್ ಗೆತೊನೊಡ್ ಪಂದ್ ಹಿರಿಯಾಕುಲ್ ಪಂತೆರ್. ಹಿರಿಯಾಕುಲು ಪನ್ಪಿನ ವಿಚಾರೊಲು ಮಾಂತ, ನಮ್ಮ ಪ್ರಸ್ತುತ ಸಮಾಜ ಮೂಡನಂಬಿಕೆ ಪಂದ್ ಪನೊಂದ್ ಇತ್ತ್ಂಡ್, ಆಂಡ ಇನಿ ಕೊರೋನಾ ಪನ್ಪಿನ ಕಾಯಿಲೆ ಬನ್ನಗ, ಹಿರಿಯಾಕುಲು ಪಂಡಿನ ಕೂಡುಕುಟುಂಬ ಪಂಡದಾದ, ನಮ ಬುಳೆಯಿನ ಅರಿಬಾರ್‌ದ ಮಹತ್ವ ದಾದ, ಪುಲಮರ್ದ್‌ದ ಶಕ್ತಿದಾದ ಪಂದ್ ಇನಿ ಮಾಂತೆರೆಗ್‌ಲಾ ತೆರಿಯೊಂದುಂಡು.
ಈ ಆಟಿದ ತಿಂಗೊಳುಡು ರೋಗರುಜಿನ ಕೈತಾಡೆಗ್ ಬರಿಯರೆ ಬಲ್ಲಿ ಪಂದ್ ಪಾಲೆದ ಮರತ ರಸನ್, ಜೀರಿಗೆ, ಕಾಳಜೀರಿಗೆ, ಓಮ, ಬೊಳ್ಳುಳಿ ಮಾಂತ ಬೆರಕೆ ಮಲ್ತ್‌ದ್ ರಸನ್ ಆಟಿ ಅಮಾಸ್ಯೆದ ಪುಲ್ಯಕಾಂಡೆ ಪರೊಂದಿತ್ತೆರ್ ಇನಿಲಾ ಕೆಲವೆರ್ ಪರ್‍ಪೆರ್. ಉಂದು ಮೂಡನಂಬಿಕೆನಾ ಬಂದುಲೇ? ಐಟ್ ಇಪ್ಪುನ ಮರ್ದ್‌ದ ಸಾರ ಇನಿ ವೈಜ್ಞಾನಿಕವಾದ್ ಸಾಬೀತ್ ಆತ್ಂಡ್. ಅಂಚನೇ ದುಂಬುನಾನಿ ಪೋದ್, ಪಾಲೆದಮರತ ಅಡಿಟ್ ಐನ್ ಬಚ್ಚಿರೆ, ಒಂಜಿ ಬಜ್ಜಿಯಿ ದೀದ್ ಪ್ರಾರ್ಥನೆ ಮಾಲ್ಪೆತೆರ್. ಉಂದು ಮೂಡನಂಬಿಕೆ ನಾ? ಅತ್ತ್ ಬಂದುಲೇ…. ನೆಟ್ ತುಳುವೆರೆನ ಬಂಗಾರ್‌ದ ಉಳ ಮನಸ್ಸ್ ತೆಂದ್ ಬರ್‍ಪುಂಡು ಕೇವಲ ಒಂಜಿ ಮರತ್ತ ಕೆತ್ತೆ ಕೆತ್ತಿಯರ ಮರಟ್ಟ ನಟ್ಟೊಂದಿತ್ತೆರ್ ಅಂಚಾದ್ ನಮ್ಮ ಹಿರಿಯ ತುಳುವೆರ್ ಪ್ರಕೃತಿದ ಪ್ರೇಮಿಲು ಪಂದ್ ಪನೊಲಿ.
ಅಂಚನೇ, ಆಟಿಡ್ ಚೇವುದ ಕಜಿಪು, ಪತ್ರೋಡೆ, ತೇಟ್ಲ ತಿಂದ್ಂಡ. ಬಂಜಿದ ಕುಜಲ್ ಕರವು ಪನ್ಪೆತೆರ್, ಬಂಜಿದ ಕುಜಲ್ ಪಂಡ ಇನಿತ ವೈಜ್ಞಾನಿಕವಾದ್ ಪನ್ಪುನಾಂಡ ಗೆಡ್ಡೆ ಬುಳೆಪುನ. ವಿಜ್ಞಾನ ಬರಿಯರ ದುಂಬೆ ನಮ್ಮ ತುಳುವೆರೆಗ್ ಬಂಜಿದ ಉಲಯಿ ಕುಜಲ್ ಬುಳೆಪುಂಡು ಪಂದ್ ತೆರಿದಿತ್ತ್ಂಡ್, ಬುಕ್ಕ ಐಕ್ ಮರ್ದ್ ಚೇವು ಪಂದ್‌ಲಾ ತೆರಿದಿತ್ತ್ಂಡು. ಈ ಆಟಿ ತಿಂಗೊಲ್ದ ಖಾದ್ಯೊಲೆನ್ ಪಂಡ್‌ದ್ ಪೂರೈಸಂದ್ “ತಜಂಕ್ ಪಲ್ಯ, ನುರ್ಗೆ ಸಪ್ಪುದ ಪಲ್ಯ, ತಿಮರೆ ಚಟ್ನಿ, ನೀರ್ ಕುಕ್ಕುದ ಗೊಜ್ಜು, ಪೆಜಕಾಯಿ ಪಲ್ಯ, ಗೊಜ್ಜು, ಉಪ್ಪಡ್‌ಪಚ್ಚಿಲ್, ಕರಂಡೆಕಾಯಿ, ನೆಲ್ಲಿಕಾಯಿ, ಅಮಚೆಕಾಯಿ, ಬಿಂಬುಳಿ, ಚಲ್ಲಂಗಾಯಿದ ಉಪ್ಪಡ್, ಕಣಲೆದ ಉಪ್ಪುಕರಿ, ಪಲ್ಯ, ಸನ್ಯಾಸಿಕಂಡೆ, ಸಾಸಿವೆ, ಮಂತೆ, ಅರ್ತಿಮರತ್ತ ಕೆತ್ತೆ, ಇರ್ಪೆ ಮರತ್ತ ಗಂಜಿ, ಕೇನೆಪುಂಡಿ, ಅವು ಅತ್ತಂದೆ, ನೆಲನೆಲ್ಲಿ, ಅಮೃತಬಳ್ಳಿ, ಕಿರಾತಕಡ್ಡಿ, ಒಳ್ಳೆಕೊಡಿ, ಬೇಂಗದ ಕೆತ್ತೆ, ಇಂಚಿತ್ತಿ ಕಷಾಯಲೆನ್ ಮಂತ್‌ದ್ ಪರೋಂದಿತ್ತೆರ್.
ಈ ನಮ್ಮ ಆಟಿ ತಿಂಗೊಳಡ್ ಕೊರಿ ಪೊನ್ನುಲು ಅಪ್ಪೆ ಇಲ್ಲಗ್ ಬರ್‍ಪೆರ್, ಅಪಗ ಅಟ್ಟೊಡ್ ಇತ್ತಿನ ಚೆನ್ನೆಮಣೆ ತಿರ್‍ತ್‌ಜಪ್ಪುಂಡು, ಚೆನ್ನೆಮಣೆನ್ ಆಟಿದ ಸಮಯಡ್ ಮಾತ್ರ ಗೊಬ್ಬೊಡು ಪನ್ಪಿನ ಪಾತೆರಲಾ ಉಂಡು, ಬಾಕಿದ ದಿನಟ್ ಅವು ಅಟ್ಟೊಡೇ ಇಪ್ಪೊಡು ಪನ್ಪಿನ ನಂಬಿಕೆ ಲಾ ಉಂಡು. ಈ ವಿಚಾರದ ಪಿರವು ವೈಜ್ಞಾನಿಕ ಹಿನ್ನಲೆಲಾ ಉಂಡು; ಜೋಡು ಪೆರ್ಗೆ, ಅರಸು ಪ್ರಧಾನಿ ಇಂಚನೆ ಸುಮಾರ್ ಗೊಬ್ಬುಲು ಉಲ್ಲ. ಇಲ್ಲದ ಅನ್‌ಜೋಕುಲು, ಊರುದಕುಲು ಸೇರೊಂದು ತಾರಾಯಿ ಕುಟ್ಟುನ ಗೊಬ್ಬುನ್ಲಾ ಗೊಬ್ಬೊಂದ್ ಇತ್ತೆರ್.
ಅಂಚನೆ ನಂಬಿಕೆದಂಚಿ ತೂದಾನಗ, ದೈವ ದೇವರೆನ ಸೇವೆ ನಡುಪುಜಿ, ಪತ್ತನಾಜೆಗ್ ಗಟ್ಟ ಬರ್ತಿನ ದೈವೊಲೆಗ್ ಕಜ್ಜ ತೂಪಾಯರ ಊರುದ ಮಾರಿ ಕಳೆಯರ ಬಿರ್ಮರಬುಕ್ಕ ಮಾಂಕಾಳಿನ ಅಂಶವಾಯಿನ “ಕಳಂಜೆ” ನಲಿತೊಂದು ಬಾಕಿಲ್ ಬಾಕಿಲ್‌ಗ್ ಬರ್‍ಪೆ. ಊರುದ ಮಾರಿನ್ ಕಳೆಪೆ. ಈ ಸಮಯಟ್ ಗುಳಿಗ ಅಂಚನೆ ಅಪ್ಪೆ ಕಲ್ಲುರ್ಟಿಗ್ ಮಾತ್ರ ಅಗೆಲ್ ಸೇವೆ ನಡಪುಂಡು.
ಆಟಿದ ಕಾಲಘಟ್ಟ ಒಂಜಿ ಸಮಯಟ್ ಬಾರಿ ಕಷ್ಟದ ದಿನ ಆಂಡ, ಜನಮಂದೆ ಒಂಜಾತ್ ಪನವು ಸಂಪಾದನೆ ಮಾಲ್ಪಿಯರ ಸುರು ಮಾಲ್ತಿಬೊಕ್ಕ ಕಷ್ಟದ ದಿನ ಮಾಜಂಡ್, ಆಚರಣೆ ಮರತ್ತೊಂದು ಪೋಯೆರ್. ಇಂಚಿನ ಸಮಯಡ್ ಕೆಲವೆರ್ ವಿದ್ವಾಂಸೆರೆನಲೆಕ ಚಿಂತನೆ ಮಲ್ತ್‌ದ್ ಆಟಿದ ಕೂಟ, ಲೇಸ್ ಸುರುಮಾಲ್ತೆರ್. ಕರಿನ ಕಾಲಮುಟ್ಟ ಈ ತಿಂಗೊಳುಡು ಸುಮಾರ್ ಸಂಘ ಸಂಸ್ಥೆಲು ಈ ಕಜ್ಜನ್ ಮಾಲ್ತ. ಆಂಡ ಇನಿ ದುಂಬುದ ಸ್ಥಿತಿದ ಆಟಿದ ಆಚರಣೆ ಮಾಲ್ಪುನ ಸ್ಥಿತಿ ಬತ್ತ್ಂಡ್ ಇಲ್ಲೆಡೇ ಆಟಿದ ಆಚರಣೆನ್ ಮಲ್ತೊಂದುಲ್ಲ. ಒಟ್ಟಾರೆಯಾದ್ ಪನ್ಪುನಾಂಡೆ ನಮ್ಮ ಹಿರಿಯೆರ್ ಪಂಡಿನ ಬಾಯಿದ ಪಾತೆರ, ನಂಬಿಕೆ, ಆಚರಣೆಡ್ ಮಾಮಲ್ಲ ಶಕ್ತಿ ಖಂಡಿತಾ ಉಂಡು ದೆನ್ ಮಾತ್ರ ಮದಪಡೆ. “ತುಳುವೆರೆನ ಮೂಡನಂಬಿಕೆ ಅತ್ತ್ ಮೂಲ ನಂಬಿಕೆ” ನಂಬಿಕೆಗೊಂಜಿ ಶಕ್ತಿ ಉಂಡು. ತುಳು ಅಪ್ಪೆಗ್ ಡೆನ್ನ ಡೆನ್ನ ಡೆನ್ನನ ಪನೊಂತು……
-ಅಜಿತ್ ಗೌಡ ಐವರ್ನಾಡು
ಮಧ್ಯಸ್ಥರು, ಅಧ್ಯಾಪಕರು
(ರಾಜ್ಯಪ್ರಶಸ್ತಿ ವಿಜೇತ)

. . . . .