ಸುಳ್ಯ: ಎಸ್.ಐ.ಆರ್. (SIR) ಪರಿಶೀಲನೆ – 11,845 ಮತದಾರರಿಗೆ ಶಾಕ್

ಸುಳ್ಯ : ಭಾರತ ಚುನಾವಣಾ ಆಯೋಗದ ನಿರ್ದೇಶನದಂತೆ ನಡೆಯುತ್ತಿರುವ ವಿಶೇಷ ಮತದಾರರ ಪಟ್ಟಿ ಪರಿಷ್ಕರಣೆ (Special Intensive Revision–2026) ಪ್ರಕ್ರಿಯೆಯಲ್ಲಿ 207-ಸುಳ್ಯ ವಿಧಾನಸಭಾ ಕ್ಷೇತ್ರದಲ್ಲಿ ಒಟ್ಟು 11,845 ಮತದಾರರನ್ನು ASDDO ವರ್ಗಕ್ಕೆ ಗುರುತಿಸಲಾಗಿದೆ. ಇದು ಕ್ಷೇತ್ರದ ಒಟ್ಟು ಮತದಾರರ ಶೇ.5.68ರಷ್ಟಾಗಿದೆ.

. . . . . . . . .

ಆ.10ರಂದು ಸಂಜೆ 4 ಗಂಟೆಯವರೆಗೆ ಬೂತ್ ಮಟ್ಟದ ಅಧಿಕಾರಿಗಳು (BLO) ಮನೆ-ಮನೆಗೆ ಭೇಟಿ ನೀಡಿ ಮತದಾರರಿಗೆ ಇನ್ಯುಮುರೇಶನ್ ಫಾರ್ಮ್ ವಿತರಿಸಿ, ಸ್ವೀಕರಿಸಿದ ಅರ್ಜಿಗಳ ಡಿಜಿಟಲೀಕರಣ ಹಾಗೂ ಪರಿಶೀಲನಾ ಕಾರ್ಯವನ್ನು ನಡೆಸಿದ್ದಾರೆ. ಚುನಾವಣಾ ಆಯೋಗದ ಎಸ್ ಐ ಆರ್ ಪ್ರಕ್ರಿಯೆಯಲ್ಲಿ ಮತದಾರರ ವಿವರಗಳನ್ನು ಪರಿಶೀಲಿಸಿ, ಅರ್ಹ ಮತದಾರರು ಪಟ್ಟಿಯಿಂದ ಹೊರಗುಳಿಯದಂತೆ ಹಾಗೂ ಅನರ್ಹ/ದ್ವಿಪ್ರತಿ ದಾಖಲೆಗಳನ್ನು ಗುರುತಿಸುವ ಉದ್ದೇಶ ಹೊಂದಿದೆ.

. . . . . . .

207-ಸುಳ್ಯ ವಿಧಾನಸಭಾ ಕ್ಷೇತ್ರದಲ್ಲಿ ಒಟ್ಟು 2,08,487 ಮತದಾರರಿದ್ದು, ಅಷ್ಟೂ ಮತದಾರರಿಗೆ ಇನ್ಯುಮುರೇಶನ್ ಫಾರ್ಮ್ ಹಂಚಿಕೆ ಮಾಡಲಾಗಿದೆ. ಈ ಪೈಕಿ 1,96,642 ಎಸ್ ಇನ್ಯುಮುರೇಶನ್ ಫಾರ್ಮ್ ಗಳು (ಶೇ.94.32) ಡಿಜಿಟಲೀಕರಣಗೊಂಡಿವೆ.

ಡಿಜಿಟಲೀಕರಣಗೊಂಡ ಹಾಗೂ ಪರಿಶೀಲನೆಯ ಸಂದರ್ಭದಲ್ಲಿ ಒಟ್ಟು 11,845 ಮತದಾರರನ್ನು ASDD ವರ್ಗದಲ್ಲಿ ಗುರುತಿಸಲಾಗಿದೆ. ಅದರಲ್ಲಿ ಗೈರು 379 (ಶೇ.0.18) ಶಾಶ್ವತವಾಗಿ ವಲಸೆ ಹೋದವರು 6,011 (ಶೇ.2.88), ಮರಣ ಹೊಂದಿರುವವರು 4,239 ( ಶೇ.2.03), ದ್ವಿಪ್ರತಿ ನೋಂದಣಿ 1,191( ಶೇ.0.57%) ಇತರರು 24 (ಶೇ.0.01) ಮಂದಿ ಇದ್ದಾರೆ

ಒಟ್ಟಾರೆ 11,845 ಮತದಾರರು (ಶೇ.5.68) ಎಎಸ್ ಡಿ ಡಿ ಓ ( ASDDO) ವರ್ಗಕ್ಕೆ ಸೇರ್ಪಡೆಯಾಗಿದ್ದಾರೆ.

ASDD ಪಟ್ಟಿಗೆ ಹೆಸರು ಸೇರ್ಪಡೆಯಾಗಿರುವುದು ಅಂತಿಮವಾಗಿ ಮತದಾನದ ಹಕ್ಕು ಕಳೆದುಕೊಂಡಿದ್ದಾರೆ ಎಂಬ ಅರ್ಥವಲ್ಲ. ಹೆಸರು ತಪ್ಪಾಗಿ ಗೈರು, ವಲಸೆ, ಮರಣ ಅಥವಾ ದ್ವಿಪ್ರತಿ ಎಂದು ಗುರುತಾಗಿದ್ದರೆ ಸಂಬಂಧಪಟ್ಟ ಮತದಾರರು ಚುನಾವಣಾ ಅಧಿಕಾರಿಗಳು ಹಾಗೂ ಬಿ ಎಲ್ ಓ (BLO) ಗಳ ಮೂಲಕ ತಮ್ಮ ವಿವರಗಳನ್ನು ಪರಿಶೀಲಿಸಿ ಸರಿಪಡಿಸಿಕೊಳ್ಳುವ ಅವಕಾಶವಿದೆ. ಎಸ್ ಐ ಆರ್ ಪ್ರಕ್ರಿಯೆಯ ಉದ್ದೇಶ ಅರ್ಹ ಮತದಾರರನ್ನು ಪಟ್ಟಿಯಲ್ಲಿ ಉಳಿಸುವುದೂ ಆಗಿದೆ.

ಕರ್ನಾಟಕದಲ್ಲಿ ಎಸ್ ಐ ಆರ್ ಇನ್ಯುಮುರೇಶನ್ (SIR Enumeration) ಹಂತದ ಗಡುವನ್ನು ಆಗಸ್ಟ್ 8ರವರೆಗೆ ವಿಸ್ತರಿಸಲಾಗಿತ್ತು. ಮುಂದಿನ ಹಂತದಲ್ಲಿ ಮತದಾರರ ಕರಡು ಪಟ್ಟಿಯನ್ನು ಪ್ರಕಟಿಸಿ, ಆಕ್ಷೇಪಣೆ ಮತ್ತು ತಿದ್ದುಪಡಿಗಳಿಗೆ ಅವಕಾಶ ಕಲ್ಪಿಸಲಾಗುತ್ತದೆ.