ಆಗಸ್ಟ್ 25ರಂದೇ ಮೀಲಾದುನ್ನೆಬಿ ರಜೆ ನೀಡಲು ಸಚಿವ ಯು.ಟಿ. ಖಾದರ್ ಸೂಚನೆ

ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ಆ. 25ರಂದು ಮೀಲಾದುನ್ನೆಬಿ (ಪ್ರವಾದಿ ಮುಹಮ್ಮದ್ (ಸ) ಅವರ ಜನ್ಮದಿನ) ಆಚರಿಸಲಾಗುತ್ತಿರುವುದರಿಂದ, ಈ ಮುಂಚೆ ನಿಗದಿಪಡಿಸಲಾಗಿದ್ದ ಆ. 26ರ ರಜೆಯ ಬದಲು ಆಗಸ್ಟ್ 25ರ ಮಂಗಳವಾರದಂದೇ ಸಾರ್ವತ್ರಿಕ ರಜೆ ನೀಡುವಂತೆ ರಾಜ್ಯ ಆರೋಗ್ಯ ಹಾಗೂ ಹಜ್ಜ್ ಮತ್ತು ವಕ್ಫ್ ಸಚಿವ ಯು.ಟಿ. ಖಾದರ್ ಅವರು ಸರಕಾರದ ಮುಖ್ಯ ಕಾರ್ಯದರ್ಶಿಗೆ ಸೂಚಿಸಿದ್ದಾರೆ.

. . . . . . . . .

ಈ ಹಿಂದೆ ರಾಜ್ಯ ಸರಕಾರವು ಆಗಸ್ಟ್ 26ರಂದು ಮೀಲಾದುನ್ನೆಬಿ ರಜೆಯನ್ನು ಘೋಷಿಸಿತ್ತು. ಆದರೆ, ಇಸ್ಲಾಮಿಕ್ ಪಂಚಾಂಗದಂತೆ ಚಂದ್ರದರ್ಶನದಲ್ಲಿ ವ್ಯತ್ಯಾಸ ಕಂಡುಬಂದ ಕಾರಣ, ಎರಡೂ ಜಿಲ್ಲೆಗಳ ಖಾಝಿಗಳು ಪ್ರವಾದಿಯವರ ಜನ್ಮದಿನವನ್ನು ಆ. 25ರಂದೇ ಆಚರಿಸಲು ನಿರ್ಧರಿಸಿದ್ದಾರೆ.

. . . . . . .

ಈ ಬದಲಾವಣೆಯ ಹಿನ್ನೆಲೆಯಲ್ಲಿ ಉಭಯ ಜಿಲ್ಲೆಗಳ ಹಲವು ಮುಸ್ಲಿಂ ಸಂಘಟನೆಗಳ ನಾಯಕರು ಸಚಿವ ಯು.ಟಿ. ಖಾದರ್ ಅವರನ್ನು ಭೇಟಿ ಮಾಡಿ, ರಜಾ ದಿನವನ್ನು ಆ. 25ಕ್ಕೆ ಬದಲಾಯಿಸಿಕೊಡುವಂತೆ ಮನವಿ ಸಲ್ಲಿ ಸಿದ್ದರು. ಸಾರ್ವಜನಿಕರು ಹಾಗೂ ಸಮುದಾಯದ ಮನವಿಗೆ ಸ್ಪಂದಿಸಿದ ಸಚಿವರು, ಆ. 25ರಂದೇ ಸಾರ್ವತ್ರಿಕ ರಜೆ ಘೋಷಿಸುವಂತೆ ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲಾಧಿಕಾರಿಗಳಿಗೆ ಮತ್ತು ಸರಕಾರದ ಮುಖ್ಯ ಕಾರ್ಯದರ್ಶಿಗೆ ನಿರ್ದೇಶನ ನೀಡಿದ್ದಾರೆ.